S brennt wieder Licht im HDB,
ganz schwach nur chaschs vo usse se.
Es isch wieder Zämmekunft.
D Spieler vo de Narrezunft,
treffe sich fascht jede Daag,
zum irgendwenn in jedre Lag,
us em Effeff am Bühnirand,
de Texscht dann z chönne us em Stand.
Doch zerscht liest me no alles ab,
Lauft uf d Bühni, wieder drab,
duet büffle, hirne, lerne, bickle,
e mänggs mol au oft ummezickle-
wenn d Regie voll Euphorie-
sait, „Chömmet, hautet nomol dri-
au wenns scho schuurig spot am Obe,
dient das Stückli nomol probe.“
S git huffe duurenand und hektig-
in dere Zit, und au e Läbdig.
Doch irgendwenn, vo jetzt uf gli—,
kehrt plötzlich rueh in d Halle i.
Z´friedeheit und au biz stolz,
das spürt sogar s Kulisseholz,
wenn jedi Nummre Sinn jetzt kriegt,
und sich alles zämmefueigt.
Und mir wüsse, s isch e Gwinn,
nit z´letscht will au dr Texscht isch din.
Und stolz gänn mir uns alli d Hand,
hänns wieder gschaffe mitenand.
Mir chönnes s alli chum erwarte,
ab uf´d Bühni, mir mien starte.
Und wenn am end au d Lüt no lache,
wänn mir das no ewig mache.

(Pius)